كبرياء وهوى | اليزابيث ومقطع قلوب العذارى

Thursday, June 27, 2019




1|ملخص كبرياء وهوى:

رواية  تتكلم عن اليزابيث  شخصية مختلفة عن أقرانها وكيف تعاملت مع مجتمع ينظر بدونية للمرأه اذا ما كانت تعرف تطبخ وتنفخ وتغني وتخيط ،
بالمختصر بذيك الحقبة الزمنية  كان المطلوب من الانثى تكون ملمة بكل شيء عشان تكون مؤهلة للزواج والا بتجلس بايرة بحلق اهلها . وايضا استعلاء الطبقة المخملية على الطبقات الي تحتهم. الرواية أيضا تقع ضمن تصنيف روايات رومانسيه لان بجزء منها تتكلم عن علاقة الحب الناشئة بين ايلزابيث و مقطع قلوب العذارى بقريتها.


 تم انتاج فيلم تحت نفس الاسم وللحين عدته اكثر من مرة، لذا قررت أقرا الرواية الاصلية بالانجليزي عشان استمتع اكثر وبعد ما خلصتها احب أقول  لجين اوستن :



 كنت متوقعة وأنا أقراها بذوب بكرسيي من حوارات البطلين .كنت منتظرة شيء مرة فوق وبعد ما قريتها هالشيء طاح على راسي وفلعني . يا الظالمة  حوار واحد بين إليزابيث وقريبها المطيور على الزواج يساوي كل حورات دارسي معاها ،اصلا الرواية كانت عن الكل ماعدى دارسي الي يظهر بسطرين ثم يختفي.

 وزيادة الطين بلة لما يتقابلون دارسي وإليزابيث بدال حوار جبار بينهم أختنا بالله جين فضلت توصف الي يصير وبس، طيب حماسي الي وقف بنص حلقي ايش اسوي به؟؟





2|الشخصيات:


  • دارسي :

عبارة عن واحد مات حباً إلا تقطع من العشق باكثر شيء يكرهه ،طبعا هذا جزاء الي يرفع خشمة على خلق ربي ويشوف محد يماثله .


  • اليزابيث:




الفيمنست ، السنعة الي صقعت مبادئ المجتمع بالحائط, كونوا مثلها وحده كان الكل يعتقد انها بتبلط ببيت اهلها وثم بعدها كوشت على اكثر رجل مطلوب بقريتها .





  • قريب اليزابيث:

هو ذيك القريبة الي بتموت على الزواج مايهم ايش مواصفات الطرف الاخر ناقص رجل ولا زايد ذراع اهم شيء يصير لقبها متزوجة .


  • ام اليزابيث : 

هذي تعامل بناتها معاملة مواعين ناشبين بحلقها تبي تتخلص منهم بأسرع وقت .

  • ليديا :

هي بنت المتوسط البازعه الي يبيلها كم لشطة خيزران عشان تتأدب.

  • جين :



هذي نوعية الناس الي تمشي جنب الجدار لاتهش ولاتنش ، طيبة بزيادة عايشة بعالم وردي تحتاج من يخضها عشان ترجع تشوف الواقع عدل .




هل انتم من الي قرا الرواية أو من الي أول مرة يسمع عنها؟؟

1 comment

  1. اتفق معاك الحوارات بينهم كانت جدا مخيبة للآمال ومبتذلة بعد كل صفحة من الكتاب كنت اقول لا حيتغير الوضع او في شي انا موفاهمته والشخصيات مافيها اي عمق ويمكن هذا قصد الكاتبة من البداية بس ابدا ماشفت
    (: سبب حب الناس لها يمكن عشان خفيفة ونفس ستايل الرومانسيات الرخيصة اللي كلنا نحبها عشان ترفه عننا وتسهل الحياة ومشقاتها في نظرنا

    ReplyDelete

Powered by Blogger.