لا تحطين أحد قبل نفسك ولا بتصيرين مثل لويزا ( Me Before You )

1| ملخص Me Before You:

الرواية رومانسية ،تتكلم عن شخصية لويزا كلارك وكيف هي همشت رغباتها عشان أختها الي قطت كل شيء عليها وهجت يازعم تلاحق أحلامها لاحقها جن يارب .


 وعلاقتها مع المسواك حبيبها الي بملابس رياضة اربع وعشرين ساعه بعدين قصة تعرفها على ويل الي يبيله ضرب بخزران. 

بعد ما طالعت الفيلم وشفت النهاية صرت لا اراديا ينقبض قلبي كلما شفت بوستر الفيلم لكني رغم ذلك قررت أقرا الرواية مو بس كيذا قريتها بأسوء وقت ينقرا مثل هالراوية فيه ، بنص تفجر الضغط وسحب كآبة أيام اختبارات الفاينال . طبعا من الاكيد أني ما كملت قرايه و وقفت لما وصلت لقريب النص منها .

لتلخيص الكتاب بجملة وحده ،إذا تبين رواية حب تبكي الرواية هذي أفضل خيار.

2| الشخصيات:

• لويزا

راعية ستايل يعطي شانيل صفر واحد واخلاقها طيبة ، تستاهل رجال يقول بها 'هاه يا دهينة لا تنكتين'.

ياعمري عليك انتي ، تستاهلين كل شيء عدل ياضناي انتي، طحتي على مهبول ما يعرف الله لكن وانا امك مرة ثانية تاكدي الي تحبينه مو واحد مكتئب لا يحوس حياتك أكثر .

• ويل 

عيوني انت يبيلك تحذيف حصى على جبهتك .

قال ايش ما ابي اعيش ، ياخي وان صار الي صار على كيف اهلك كيذا تنهي حياتك  والفقيرة الي حبتك يعل جبهتك تقب حبوب شباب ؟؟؟
بس لو نتكلم بالجد هو ترى ماينلام لان عدم الحركة يولد سلسلة من الامراض الي ماتنتهي وكون الشخص مقيد الحركه أيضا يولد اكتئاب وهذا اخطر حتى من الاعراض الجسدية لان الجانب النفسي يكون أهم بكثير مراحل . وكونة شخص محب للحركة و صبر سنتين ليتخذ القرار الي اتخذه بالنهاية  شيء منطقي لكن مو مبررللفعلة الهبلة الي سواها .

• اخت لويزا ماني حتى  متنازلة أكتب أسمها

من وجهة نظر لويزا كانت وحدة انانية خذت ولدها وتركت الجمل بما حمل على ظهر اختها لكن من وجهة نظر حيادية برافو عليها لانها حطت نفسها ورغباتها اولا لما سنحت لها الفرصة تتطور اكثر.

• حبيب لو 

وذا ماغير يراكض طول اليوم ويبلع بذا البروتين صبح ليل والا غصب لويزا تصير زيه ، على هذا المنوال مابيصك الاربعين الا وهو بسمك الشعرة من ورى كل هالرياضة والدايت.