مسلسل كوزغون، الغراب| الموسم 2| الحلقة 1.

Thursday, September 19, 2019




قبل مانبدأ ننتف الشخصيات أحب أقول كان أملي بالكتاب عالي والحمدلله ما خيبوه ، اولا كل احداث الاعلان صارت بالبداية ما خلو لحظة تواجه كوزغون مع بنتي ديلا للاخير والحلقه كانت مليانة احداث.



نبدأ بحبايبنا الشخصيات:

  • كوزغون:

لانه كان يدور عنها سنة كامله وباله مشغول عليها فلما جرحته بردها راح جرحها بالكلام.
باختصار لو نظرنا من وجهة نظرهم اثنينهم بنلاقي ان لهم الحق يتصرفون كيذا،
لكن !


 أكشخ قام الاخ يقدر التعليم ومايبي احد ينتهي مثله . يحتسب له انه رضى يطلق بسهولة عكس الي توقعته انه يجبرها تظل زوجته لانه يحبها .
بالكوخ أنبح حلق ديلا وهي تعدد له كيف انه نعال بن نعال وما له حق يطالب برجوعها  بعد كل الي خلاها تعيشه ، تخيلوا ان رده على كلامها كان:


 انتي تحبيني لاتنكرين !!!!!!!

راحت المسكينة ردت عليه كود مخه المصدي يفهم:
 ديلا تلك ماتت وانا قررت اعيش حياة بدونك 
و الرد الي جلط ديلا وجلطني كان :
مستحيل انتي اكيد فرمان مهددك باحد هل هو مهددك بروحي ؟


يقولك عجز العلماء عن معرفة سر هالثقه القاتله ،لو اني مكان ديلا وربي كان فصخت الكعب الي علي وعلى راسه .
لكن بصفتي امه سابقا قبل ما أتبرا منه لفعايله النكراء الي سواها ،احب أقول لا إله إلا الله عليه رغم المصايب الي مر فيها ما صار لين لو شوي ، ظل نفس يابس ألراس كوزغزن الي كلنا نعرفه.


  • فرمان:

نشكره على نسف جبهة كوزغون بين الحين والاخر هالحلقه. اظن ان سر امه يتضمن كونه يا اخو كوزغون من الام وهذا يفسر تخلي مريموه عن كوزغون بالبداية أو الي يظنه عن بهرام كذب .


  • جيهان:

oh sh*t here we go again
ذا ياحبة عيني طول الحلقة وضعه كان كيذا  كل مرة كوزغون يفقد اعصابه .


  • قونيش:

الا والله اسمها غثاء مو شمس . طبعا ذي النسخة الاسوء من افسون وعندي احساس بيجيني من وراها رفعة ظغط لاصارت ولا استوت ، لا بالله كدينا خير .




  • ديلا:


أنا احس انها مخبية شيء ولانها تبي ترد كرامتها من كوزغون تبي اول شيء تذله شويتين عشان يبرد قلبها من ناحيته بعدين ترضى عليه،لكن الخايس من بعد أول محاولة تخلى عنها ورجع لعادته القديمة بكلام يسم البدن، ليه؟

هالمرة ديلا مو زي الموسم الاول مراح تتنازل عن عنادها  أبدا الا لو كوزغون تنازل بالاول عن عناده .
صراحه شخصيتها صايرة تصروع كيف لما وصلوا للكوخ كانت بدون اي تعابير بعدين فجاءة قلبت صارت تضحك بوجهه وتعطيه الكلام الي يبيه . بعدين يا حبيبي مو بس نسفت جبهته الا كبت اكبر طشت ماي بارد على راسه وصدمته .
 للامانه كنت وحطوا تحتها الف خط متعاطفه مع كوزغون هنا لين مارد عليها :مستحيل تحبي غيري 


حبك برص وعقارب خرص ان شاء الله ،المرأه تتكلم بوادي وانت بوادي ثاني .لذا عااااشت بنيتي ديلا عذبييييه اكثر لين يتعلم مايهايط عليك مرة ثانية وبعدها إن برد قلبك يا رجعيه بحياتك ولا ارفسيه منها.

اشكر كتاب المسلسل شكر كثير كثييييير على عدم جعل يوسف حي بسناريو تقليعي من كيسهم.




No comments

Powered by Blogger.