مسلسل كوزغون ، الغراب| الموسم 2| الحلقة 2.

Friday, September 27, 2019

الحلقة كانت بعنوان " كوزغون ضروري يحذف كبرياءه بأقرب زباله"


لذا نستفتح التعليقات بالاخ كوزغون:

  • كوزغون
يا أخي اتعبتني وربي اتعبتني ولوعت كبدي بعنادك وراسك اليابس ، الحين إيش ينقص منك لو رجعت من جديد وسالت ليه اختفت؟؟ وين كانت؟؟ وقلت لها انا اسف على الي مضى  لكن كل الي صار السبب فيه مو احنا ،احنا ضحية حتى لو انبح صوتك وانت تعيد وتزيد بالاعتذار .



ادري اعتذارك ما بيمحي فعايلك النكراء بس يقطع ابليسك الي سويته فيها مو عادي . أنت مسحت بكرامتها الارض اكثر من مرة .عيشتها اسوء شعور وهو صراع بين اهلها وبينك .لوم نفسها على قتل أبوها كل مرة انت تنفذ خطط انتقامك .

و بكل جراءة و وساعة وجه و ثقة يبيلها تكسير تبيها تغفر لك كل ذا و تجي ركض لك عشان إيش ؟؟ 
اعتذار، ما كلفت نفسك تعتذر ابدا .
 توضيح، ما كلفت نفسك توضح انك ما تدري عن خطة قتل العله ابوها .
على اييييييييييش تبيها ترجع لك ؟ 

ياخي ادعس على كبريائك ورح لها .كم مرة وقفت بصفك؟ كم مرة المسكينة ترجع لك عشانها تحبك ؟وبنتي صادقة يوم تكرمت ونطقت انك حبيتها (يعل يحبك جني قل اميييين) قلتها كانك تتكرم عليها .
كل ذا ابد ما خطر على الحطبه الي داخل راسك ؟؟

وبعدين مو انت الوحيد على الكرة الارضية الي عنده كبرياء. إيش بيصير لو ارضيت قلبها الفقير الي تعب وضل يحارب لاجلك شويتين و رجعت تسأل من جديد ، هي بس عشانها رفضت ترد عليك عطيتها ظهرك و زيادة هددتها  ؟؟؟




 أخ يا ربي ذا الولد بيخليني اقطع شعري من غباااائه ،بالانتقام مخه عشرة على عشرة لكن بمواضيع الحب يصير اغبى ما خلق ربي .
قال ايش شفتها تحط خاتم غيري باصبعها ،وحطت يعل يحط على راسك جني 
رح استفسر أكثر !! بس فالح يقول للناس عن حبه لها ولا شافها قعد يستفزها .

يالله ياربي وانت ربي ايش هالولد الغببببببي. شف إن ما رحت وقلت لها كيف إنك غارق بالنخاع بحبها ومستعد تضحي حتى بالخرابة الي اسمها حي وفوقها البرتقالية الملقوفة اختك مع خريتيل أخوك في سبيل تكون معاها ، وربي لا تعشعش بالسطوح  بروحك تدردع هالمسكرات لين أخر عمرك وانت تتحسر عليها ،قد أعذر من أنذر .



  • الحية البرتقالية(غونيش)
هذي قدرها أندومي حار مليان شطة تأكله تحت شمس الظهر بدون ما تعطيها منديل، مو تأخذها تأكل مع أهلك يا اهبل يا كوزغون .



وسيعة الوجة ، أوقح ما خلق ربي البرتقالية الحية تقول لبنتي 
أنا عازبة أطلع مع الي ابي مو مجبورة ابرر لك .
إلا تبررين ورجلك فوق رقبتك . من وين دريتي ان في يابس رأس أسمه كوزغون إلا من ورى بنتي ؟؟
و بعد تقول هل تغارين مني 

غارت عليك صواريخ وقنابل قلي آمييين .على أساس كوزغون ميت بحبك ، ياربي ذي ايش فهمها ان مو كل رجال يمدح فيك يعني يحبك . وختمت كلامها لبنتي : 
اعرفي حدك ؟؟؟؟؟؟؟؟؟؟؟؟؟؟؟؟؟؟؟؟؟؟؟
عيدي ما سمعت مين الي يعرف حده بنتي ولا انتي الي جلستي تسمعين من بنتي عن كوزغونه بعدين شلتي شلايلك وتعقبتيه ؟؟


  • مريموه 
هذي عمر ما جاء من وراها خير أبد فلما شفتها تحاول تلصق يابس الراس مع البرتقالية جليلة الحياء ابدا ما استغربت و بعدين متى تشوفينه وهو طول يومه بالشوارع ولا بدكانه ماعدا دقيقتين يجي يأكل عندك عشان يجلس يسهب بالحديث مدحا بشينة الحلايا غونيش 



عليها كذب مو صاحي هالحرمه.


  • بنيتي ديلا 
وعلي على بنتي الطيبة راحت تساعد الحية البرتقالية تختار ملابس فرحانه لها ، ما تدري انها رايحه ليابس الرأس .
بس ماني فاهمه ليه ما فجرتيها وقلتي غونيش تقرب لفريمان ، لكن أعجبتني كيف بالنهاية ألجمتيها وانتي تقولين بالفم المليان
خبر سيء لك ذلك الرجل واقع بحبي 



ايوه علمني المجنونه مين كوزغزنه ميت بحبه 
لكن للان ماني فاهمة سبب جلستك عند فرمان او محاولتك الزواج فيه وانتي قلبك الخاين ما زال يتنافض لاشاف كوزغون .

  • فريمان 
عجبني كيف هو عكس كوزغون باشياء كثير مثل: انه متحضر بأسلوب مدني بارد بوتيرة صوت هادية ،بينما الاخ كوزغون شخص ساخط على العالم اسلوبه استفزازي بلكنة ثقيلة وصوت جهور.  

للحين ماني قادره احدد سبب اهتمامه بديلا بنتي وهل هو مفصول اسلاك مجنون يحبها أو عاقل ديلا طلعت بطريقه وحس ان ظروفهم تتشابه .

  • كارتال 
سابقاً كان يعرف بكريتيل والان راح اسميه خرتال .


انا معاه في إن كوزغونه سبب دماره ،لكن يظل اخوك يا الردي مو زي المخيس عليوي الي عشانه قتلت مساعد بورا و انسجنت والحين من جديد بتروح لصفه . صدق انك اخو كوزغون لكن ذكائك بالانتقام مو زيه . لكن  ما انكر انه غلطان ومعاه حق بنفس الوقت .

بالنهاية أحب أقول:

  • اسمعوا وأعوذ بالله من هالفكرة لكن الكاتبات ما ينعرف كيف يفكرون فيوجد احتماليه ان كوزغون بيستمر بكبريائه ابو ريالين وفي هذي الاثناء بنتي ديلا بتقع بحب فريمان وتسحب على الي خلفوا كوزغون .

  • نشكر الكاتبات انهم ما مططوا سالفة الرسالة الي للاسف الكل كان متوقع محتواها لكن لاني أؤمن بابداعهم من الموسم الاول اعطيهم فرصة وانتظر الحلقة الجاية .

  • بالحلقة الاحداث بين بنتي وزوجها السابق يابس الراس ما كانت كثير ما غير ارتفع ضغطي وانفقعت مرارتي من كوزغون وغبائه المستفحل وجراءة الحية البرتقالية  .

  • اتمنى من اعماق قلبي ان يويسف مازال ست اقدام تحت الارض ميت وما تطلع ديلا باقيه مع فريمان بسبب شيء هو يهددها فيه مثل :لا قدر الله ، طفلها من كوزغون. ما ابي احفاد الا لو استعدل كوزغون  و حاول مليون مرة لين يرضى كبرياء بنتي عليه.




No comments

Powered by Blogger.